Álfheiður peppar liðið

Álfheiður Ingadóttir, þingmaður vinstri grænna.

Þingmenn sögðu smáfuglunum, að furðulegt hefði verið verið að fylgjast með þingmönnum vinstri-grænna þriðjudaginn 20. janúar, þegar mótmælendur reyndu að trufla störf Alþingis með mótmælum undir merkjum Radda fólksins. Ekki færi á milli mála, að Álfheiður Ingadóttir, þingmaður, hefði enn á ný verið í beinu sambandi við þá, sem verst létu í árásum á þinghúsið.

Þegar mótmæli voru við lögreglustöðina á sínum tíma, var Álfheiður þar ásamt Sigurmar K. Albertssyni, eiginmanni sínum, sem greip til þess ráðs að greiða sekt manns, sem sat inni í stöðinni í óþökk mótmælenda. Þegar mótmælendur ruddust inn í þinghúsið, var Álfheiður greinilega í sambandi við þá og hrópaði af hneykslan vegna framgöngu lögreglu.

Hinn 20. janúar urðu menn í þinghúsinu vitni að því að Álfheiður var í símasambandi við þá, sem gerðu árás á þinghúsið. Hún gerði einnig hróp að lögreglu, þegar hún flutti handtekna til geymslu í bílakjallara þingmanna. Í þingsalnum var hún með hróp og köll – þótt hún sleppti sér ekki á sama hátt og Ögmundur Jónasson, en hann tók slíka ræðu- og reiðisyrpu í upphafi þingfundar, að engu var líkara en hann væri í hópi þeirra, sem öskruðu utan dyra.

Vinsælt er að tala um póltíska ábyrgð um þessar mundir og menn eiga ekki að hika við að axla hana. Vinstri-grænir eru fremstir í flokki þeirra, sem segja stjórnmálamenn ekki eiga að skjóta sér undan ábyrgð. Smáfuglarnir velta því fyrir sér hvers vegna vinstri grænir láti alltaf eins og þeim sé málið óskylt, þegar minnst er á pólitíska ábyrgð þeirra á ólátum og jafnvel skemmdarverkum mótmælenda?

AMIX