60 ára afmælistónleikar Björgvins Halldórssonar 16. apríl

Farið yfir ferilinn á afmælisdaginn í Háskólabíói með góðum gestum

Ráðgert að hefja miðasölu innan skamms

Björgvin Helgi Halldórsson, söngvari frá Hafnarfirði, heldur upp á sextíu ára afmæli sitt með tónleikum í Háskólabíói á sjálfan stórafmælisdaginn, laugardaginn 16. apríl, ásamt völdum hljóðfæraleikurum og góðum gestum.

Þar verður rifjaður upp einstakur ferill Björgvins í rúm 40 ár, allt frá því hann var kosinn poppstjarna ársins árið 1969 til dagsins í dag, með viðkomu hjá HLH, Brimkló, Lónlí Blu Boys, Eurovision og Hjartagosunum og jöfnum höndum sungin Íslandslög, rokklög, ballöður af dýrari tegundinni og kántrí.

Auk þess að syngja á dansleikjum og í brúðkaupum, söngvakeppnum og stórtónleikum hefur Björgvin leikið í kvikmyndum og leikhúsum, stjórnað sínum eigin upptökum og annarra og náð að hljóðrita nær 900 lög sjálfur og með öðrum. Telst hann þar með vera einn allra afkastamesti flytjandi þjóðarinnar.

Björgvin Halldórsson var sæmdur riddarakrossi hinnar íslensku fálkaorðu síðastliðinn nýársdag fyrir framlag sitt til íslenskrar tónlistar. Og það er ekki slegið slöku við; framundan er ný plata með Hjartagosunum og svo eru fimmtu Jólagestir Björgvins komnir á blað sem og önnur spennandi verkefni.

Afmælistónleikar Björgvins í Háskólabíói þann 16. apríl verða á persónulegum nótum og mikil tónlistarveisla sem enginn lagviss maður ætti að missa af.

Staðfestir gestir í afmælinu eru: Eyjólfur Kristjánsson, Jóhanna Guðrún, Krummi, Mugison og Sigríður Thorlacius. Fastlega má búast við því að fleiri gestir bætist í fögnuðinn áður en yfir lýkur.

Hljómsveitin er sett saman í tilefni dagsins og er þannig skipuð:

Gítar: Jón Elfar Hafsteinsson
Gítar og steel: Sigurgeir Sigmundsson
Gítar og raddir: Eyjólfur Kristjánsson
Hljómborð og raddir: Þórir Úlfarsson
Bassi og raddir: Friðrik Sturluson
Slagverk og raddir: Hannes Friðbjörnsson
Trommur: Jóhann Hjörleifsson
Hammond: Þórir Baldursson

Ráðgert er að hefja miðasölu í lok mánaðarins á Miði.is og öllum sölustöðum Miði.is. Aðeins 900 miðar verða í boði. Nánar verður tilkynnt um fyrirkomulag miðasölunnar innan skamms.

Björgvin á Tónlist.is
Björgvin á Wikipedia
Viðburðurinn á Miði.is